13
Jun
08

Boewe sny 2 vingers af

Source: http://www.news24.com/Beeld/Suid-Afrika/0,,3-975_2339831,00.html

Jun 12 2008 09:24:45:853PM – (SA)

Virginia Keppler

’n Sakeman van Olifants-fontein naby Midrand se een oor en twee vingers is Maandagoggend tydens ’n “opsetlik gewraakte” gewapende aanval afgesny.

Hy en sy vrou is ook herhaaldelik met ’n mes gesteek en met ’n hamer en koevoet geslaan.

Mnr. George Rossouw (53) van Koedoestraat in Clayville se linkeroor en wysvinger en pinkie aan sy linkerhand is tydens die aanval met ’n mes afgesny.

Hy is herhaaldelik oral oor sy lyf met ’n hamer en koevoet geslaan en is 12 keer met ’n mes gesteek. Sy vrou, Bernie (50), is ook met ’n mes in die gesig en rug gesteek. Van haar ribbes is gebreek en haar longe is stukkend gesteek.

Die egpaar, eienaars van ’n spysenieringsonderneming, het in ’n plas bloed gelê toe hul sekuriteitsmaatskappy, die polisie, ambulansdiens en hul twee dogters by die toneel opgedaag het.

Hulle is in ’n baie ernstige toestand in die waakeenheid van die Unitas-hospitaal in Pretoria. Mnr. Rossouw se oor is intussen tydens ’n noodoperasie weer aangeheg.

Die aanval het Maandag omstreeks 04:00 plaasgevind.

Me. Carmen Rossouw (31), hul een dogter, het gesê die rowers het ’n hek met ’n onbekende voorwerp stukkend gesny om toegang tot die erf te kry.

“Die elektriese heining was aangeskakel, so hulle kon nie oor die heining kom nie. Die rowers het toe die veiligheidshek by die kombuisdeur oopgebreek en by die kombuisdeur ingebreek om in die huis te kom,” het Rossouw gesê.

Volgens haar het die alarm afgegaan toe die rowers by die huis ingegaan het. “So ver ons weet, was daar net twee aanvallers. Hulle was gewapen met ’n koevoet, hamer en mes.

“Hulle het my pa in die kombuis ingewag en hom oorrompel toe hy in die gang af stap. My ma was agter my pa en het gesien toe hulle my pa oorval. Sy het gehardloop om hom te probeer help.

“Dit was ’n gewraakte aanval. Dit was opsetlik. Hulle het net gesteek, geslaan en gesny.”

Me. Rossouw het gesê ADT-sekuriteit het gereageer op die alarm. Toe ADT by die huis aankom, het hulle een persoon by die hek gesien. Die aanvallers het toe onmiddellik gevlug.

Rossouw het gesê volgens haar ma het die aanvallers herhaaldelik gevra vir vuurwapens. Hulle het uiteindelik gevlug sonder om iets te steel. “My ma en pa was teen daardie tyd plat op die vloer en kon niks doen nie. Hulle het probeer om kamer toe te kruip om by ’n foon uit te kom.

“My ma sê soos wat sy asem ingeasem het, het die lug by haar rug uitgegaan. Sy het egter daarin geslaag om haar foon in die kamer te kry en het ons gebel.

“My ma sê dit is met God se krag dat sy by die telefoon kon uitkom en bel.”

Volgens haar het die polisie, sekuriteitsdiens en die ambulans gou opgedaag en hulle uitstekend van hul taak gekwyt.

Rossouw het gesê haar ouers kan nog nie self praat nie, maar sal graag hul storie self wil vertel sodra hulle beter voel.

Sy het gesê daar is ’n kettinggebed-aksie oor die wêreld aan die gang vir haar ouers. “Ons is dankbaar dat soveel mense vir ons bid.

“Ek en my suster, Candy (30), moet net sterk bly vir ons ouers. Ons is bevoorreg dat ons verloofdes ons bystaan en ondersteun,” het Rossouw gesê.

Konst. Stella Madumo, polisiewoordvoerder, het gesê die polisie ondersoek ’n klag van huisroof.

Niemand is nog in verband met die aanval aangekeer nie.

Advertisements

0 Responses to “Boewe sny 2 vingers af”



  1. Leave a Comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: